الدروس المستفادة من كورونا

يوما ما سينتهي كورونا بإذن الله و لكن المهم استفدنا ايه من كورونا .. الدروس و العبر

إياكش تكون فاكر ربنا بعت كورونا عشان يعلم علينا أو عشان يعلمنا نغسل إيدينا و نهتم بصحتنا و نعرف قيمة الكحول و الكلور

طول الفتره السابقه و حاليا و انا بتأمل في الدروس المستفادة من كورونا ..احب أشارككم بعض أفكاري

١- الإنسان دعيييف (بصوت عبد الملك زرزور😂) : انت لاشيء .. ربنا بيهلكنا بأضعف و أدق مخلوقاته عشان يقولك متفرحش بنفسك و ما تتنططش .. فيروس لا يري بالعين بيعطل العالم كله

مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا ۚ إِنَّ ذَٰلِكَ عَلَى اللَّهِ يَسِيرٌ (22)لِّكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ (الحديد :23)

٢- طلع اليوم العادي اللي مكانش عاجبنا ده نعمه كبيره.. مصافحة الأصحاب نعمه .. 🤝 عناق الأهل و الأحباب نعمه .. أن تتنفس بغير خوف نعمه..التزاور نعمه.. مشاهدة طواف الكعبه 🕋🕋حتي و إن لم تزرها نعمه

نحن نعوم في بحور النعم و احنا فاكرينها عادي ..لأ مش عادي و ممكن تتسحب منك لو لم تؤدي شكرها

٣- زهقان من قعده البيت؟🤔 .. هيعملوا حظر و هتزهق أكتر ؟ هتطق من جنابك؟😂 اكتشفت فجأه أن اليوم طويل و مش لاقي حاجه تتعمل

طب ده ملفتش نظرك أن اليوم الطويل ده احنا بنضيعه يوميا في هبل و لاشيء رغم أن سؤال

"عن عمره فيما أفناه" أحد الاسئله الإجبارية يوم الحساب

٤- العالم الآن ٧ مليار شخص خايفين

الخوف يسيطر على الجميع

خوف علي النفس و الحياه و الصحه و الاهل و الأحباب و الفلوس و الشغل

عشان كده فهمت ربنا لما اتكلم عن الجنه قال

وَمَا أَمْوَالُكُمْ وَلَا أَوْلَادُكُم بِالَّتِي تُقَرِّبُكُمْ عِندَنَا زُلْفَىٰ إِلَّا مَنْ آمَنَ وَعَمِلَ صَالِحًا فَأُولَٰئِكَ لَهُمْ جَزَاءُ الضِّعْفِ بِمَا عَمِلُوا وَهُمْ فِي الْغُرُفَاتِ آمِنُونَ (سبأ 37)

مجرد إنك تكون فقط في غرفة آمن من الهلاك .. دي جنه في حد ذاتها

٥- لو لم تشعرك هذه المحنة بالعوز و الحاجه الى الله .. راجع إيمانك ..و رقق قلبك من جديد

" فَلَوْلَا إِذْ جَاءَهُم بَأْسُنَا تَضَرَّعُوا وَلَٰكِن قَسَتْ قُلُوبُهُمْ وَزَيَّنَ لَهُمُ الشَّيْطَانُ مَا كَانُوا يَعْمَلُونَ (الأنعام 43)

٦- جربت فكرة الحجر الصحي أو العزل الطبي ..😷 اوضه مفيهاش حد بس ممكن موبايل و نت و اتصالات و تليفونات .. حاجه تزهق ..صح؟

تفتكر القبر هيبقي عامل ازاي 😒

لا ناس و لا واي فاي و لا موبايل و لا قهوتك المفضله و لا أي شيء سوي الصمت و الظلام و ياريت علي أد كده

٧- هل حطيت plan هتعمل ايه لو حصل حظر

هل عندك to do list

قائمة حاجات عاوز تعملها و تنجزها

و لا مجهز المسلسل التركي و اللب و السوداني

صدقني الأوقات أضيق كتير من الواجبات

في ١٠٠ حاجه تعملها في الفراغ

اقرأ .. احفظ قرآن .. خد كورس online .. لخص ماده علميه و اعملها فيديو أو محاضره .. ألف كتاب .. كلم قرايبك و صل الرحم

٨- أظن بقي واضح تماما أن العلم هو سلاح أي أمه

يحمله الأطباء وقت الأوبئة و الأمراض

و تحمله الجيوش وقت الحروب

و يحمله المهندسون و الجيولوجيون وقت الزلازل و البراكين

👨‍💻👨‍🍳👨‍🚒

من غير علم .. انسي .. انت لاشيء .. مقياس نهضة الأمم بتقديرها و اهتمامها بالعلم و العلماء ..أظن الرساله وصلت

٩- أنا و انت و كلنا مسئولون عن هذا الابتلاء

كورونا لم يميز دين و لا عرق

ربنا بيقول

"ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ (الروم41)

قال أيدي الناس و لم يقل الكفار و لا الملحدين

و قال لعلهم يرجعون

يعني لازم الابتلاء يغير حاجه فينا .. مينفعش نخرج منه بكمامه و جوانتي و إزازة كحول ايثيلي ٧٠% 😂😂

١٠- خايف على بيتك .. خايف علي عيالك .. خايف على أهلك

خد بأسباب الدنيا كلها و ده الصح و عين الصواب

و لكن متنساش الروشته القرآنية لهذا الخوف

وَلْيَخْشَ الَّذِينَ لَوْ تَرَكُوا مِنْ خَلْفِهِمْ ذُرِّيَّةً ضِعَافًا خَافُوا عَلَيْهِمْ فَلْيَتَّقُوا اللَّهَ وَلْيَقُولُوا قَوْلًا سَدِيدًا (النساء 9)